Осовременувајќи ја Сирма Војвода во урбан контекст

За проектот

Проектот „Осовременувајќи ја Сирма Војвода во урбан контекст“ е коавторски проект на поетесата и слемерка Елена Пренџова и книжевниот историчар Славчо Ковилоски. „Осовременувајќи ја Сирма Војвода во урбан контекст“ претставува едукативно-креативна работилница за едукација од областа на културносто наследство и креативно пишување преку кои учесничките и учесниците подетално ќе се запознаат со ликот, делото и културолошкото значење на Сирма Војвода, а стекнатото знаење ќе им послужи како инспирација за пишување авторска поезија.

Овие едукативно-креативни работилници доаѓаат како дополнување на формалното образование кое има ограничен фонд на часови по предметот македонски јазик и литература. Овој проект придонесува да се покрене свеста на младите за нематеријалното културно наследство и нивната важност за широките познавања на изградена образована личност родена на територијата на нашата држава. Стекнатите знаење веднаш ќе бидат применети во активно и креативно пишување слем-поезија, која како жанр, исто така не фигурира во формалното образование по мајчин јазик и литература.

Во нашиов контекст, тоа би значело следново: избор на пишаните книжевно-историски дела за Сирма Војвода, а прикладни за средношколската возраст, кои ќе претставуваат централна тема на работилниците.

Во рамките на проектот „Осовременувајќи ја Сирма Војвода во урбан контекст“ ќе се одвиваат следниве програмски активности:

• Воведно предавање за Сирма Војвода:  запознавање со ликот и делото на Сирма Војвода, нејзината историско-културолошка важност, како и народните и авторските дела посветени на неа.

• Воведно предавање за слем-поезија и креативно пишување на слем-поезија:  запознавање со жанрот слем-поезија. На оваа сесија присутните ќе се стекнат со следниве знаења:

• Дефинирање и објаснување на жанрот слем-поезија;

• Слемот како сукултура, активизам и социјална и општествена ангажираност;

• Практична работа и дискусија на избрани слем-песни;

• Техники на пишување слем-поезија и перформативна поезија – прозодија;

• Техники на изведување слем-поезија и перформативна поезија;

• Оригиналност, цитатност, интертекстуалност и плагијаторство – дефиниција, објаснување и практична вежба;

• Практична вежба за пишување краток текст за изведување и изведба.

• Креативно пишување – ревидирање и уредување на авторски текстови и воведно предавање за техники на снимање видео со мобилен телефон. Планот за работа на оваа сесија е следниов:

• Практична вежба за искажување конструктивна критика и прифаќање наспроти отфрлање на конструктивните критики;

• Практична вежба за презентација и давања и примање на конструктивната критика, како и одбрана на своите ставови;

• Практична вежба на уредување и ревидирање на авторските текстови од вежбите – практична примена на конструктивната критика онаму каде ќе се оцени за пожелна.

• Техники за учење текстови напамет.

• Техники на видео-изведба, односно изведба пред камера;

• Техники на снимање видео со мобилен телефон;

• Техники на монтирање на снимените видеа.

Коментор(к)и: Елена Пренџова и Славчо Ковилоски.

Трудовите изработени од учесничките и учесниците на работилницата ќе бидат прикачени и на веб-страница која ќе биде направена специјално за потребите на проектот, како и на социјалните мрежи и останатите интернет видео-платформи.

​

ПРИЈАВУВАЊЕ И ОДРЖУВАЊЕ: Пријавувањето е во тек, а работилниците ќе се одржат во јуни, по договор. Работилниците се отворени за заинтересирани од сите возрасти и од цела Македонија. Групите ќе се формираат според возраста, а средбите ќе бидат и/или со физичко присиство и/или оналин, по договор и во зависност од местото на живеење на пријавените.

* Авторските права за идејата на креативните работилници при проектот „Осовременувајќи ја Сирма Војвода во урбан контекст“ се интелектуална сопственост на Елена Пренџова и Славчо Ковилоски. Не е дозволено делумно ни целосно преземање, копирање и користење на идејата и програмските активности без нивна претходна согласност и дозвола.

​

** РАБОТИЛНИЦАТА „ОСОВРЕМЕНУВАЈЌИ ЈА СИРМА ВОЈВОДА ВО УРБАН КОНТЕКСТ“ СЕ РЕАЛИЗИРА СО ФИНАНСИСКА ПОДДРШКА НА МИНИСТЕРСТВОТО ЗА КУЛТУРА НА МАКЕДОНИЈА.